Маңғыстау: 105 жастағы қария ұзақ өмір сүрудің құпиясын айтты

Маңғыстау облысының 105 жастағы тұрғыны Қанзия Сахауова ұзақ өмір сүрудің қарапайым әдісін айтып берді.

Хабар 24 арнасына сұхбат берген Қанзия Сахауова уайымға салынбауға және бос уақытын жұмысқа арнауға тырысады. Кейде ол тіпті ескі тігін машинасымен жұмыс істейді. Жасы ұлғайғанына қарамастан, немере-шөберелерінің атын шатастырмай, есінде сақтайтынын айтты.

Қанзия Сахауова 105 жаста. Қартайғанына қарамастан, ол әйелдер әрқашан сыртқы келбетіне күтім жасауы керек деп санайды. Ұлттық зергерлік бұйымдар: күміс жүзік, сырға, шашбау – әжейдің сүйікті әшекейі.

– Ұзақ өмір сүрудің сыры – еңбекте және басқа адамдарға алғыс айтуда жатыр. Күнде күліп жүруге тырысамын. Әрине, сыртқы келбетіңізге қамқорлық жасаңыздар. Әйел 105-те де әдемі болуы керек, - дейді Қанзия Сахауова.

Қанзия Сахауованың екі баласы қолында қалған, күйеуі майданда қаза тапқан. Екі баласын өсіріп қана қоймай, көпке үлгі болған. Колхозда жұмыс істеп, депутат ретінде қызмет атқарған.