Мәжілістің жалпы отырысы бір минут үнсіздікпен басталды

Мәжіліс депутаттары жалпы отырыста бұрынғы Туризм және спорт министрі Темірхан Досмұхамбетовті бір минут үнсіздікпен еске алды.

Бұл туралы Orda.kz хабарлайды.

– Көпшілігіңіз Темірхан Мыңайдарұлы Досмұхамбетовті білетінсіздер. Ол еліміздің дамуына орасан зор үлес қосқан нағыз бірегей тұлға. Көрнекті мемлекет қайраткері, Қазақстан тәуелсіздігінің бастауында Елбасымен бірге болғандардың бірі. Түрлі салада еңбек етті, туризм және спорт министрі, елорда әкімі болды, Ұлттық Олимпиада комитетін басқарды, – деді Мәжіліс төрағасы Нұрлан Нығматулин.

Нығматулин Досмұхамбетовтің заң шығару қызметін XII сайланған Жоғарғы Кеңесте бастап, кейін оны жалғастырып, V шақырылымдағы Парламент Мәжілісінің депутаты болғанын айтты.

Темірхан Досмұхамбетов соңғы уақытта ауыл шаруашылығымен айналысты. Ал өзі басқарған «Байсерке-Агро» ғылыми-өндірістік холдингі бүгінде Қазақстанда ғана емес, шетелде де танымал.

– Ол шынында да өте жауапты, шынайы, еліміздің нағыз патриоты еді. Тағы да барша депутаттық корпус атынан отбасына, туған-туыстары мен жақындарына көңіл айтамыз, - деді Палата Спикері.