Мәжіліс депутаты мектепке хиджаб киюге рұқсат беру туралы айтты

Жаңа оқу жылының басталғаны сол еді, балалардың киім үлгісіне қатысты дау кең етек жая бастады.

Бұл туралы Orda.kz хабарлады.

Жақында ата-аналар ҚР Білім министрлігіне хат жолдады. Онда олар қыздарына мектепке хиджаб (кимешек) киюге рұқсат беруді сұраған. Бірақ министрлік өзінің 2016 жылғы 26 бұйрығына сілтеме жасап, «бірыңғай форма болуы керек» деп қысқа ғана жауап қайтарды.

Осыған қатысты Мәжіліс депутаты Бекболат Тілеухан Қасқа жол бағдарламасында өз ойымен бөлісті.

– Егер демократияшыл болсақ, өзінің құқын – басындағы орамалын сұрап жатқандарға да демократиямен қара. Оған келгенде ешкім демократияшыл емес. Қоғамға өте қауіпті деп біледі. Берген Бұйрығы Конституцияға қайшы, - дейді Тілеухан.

Депутат кимешекке тыйым салу ҚР Конституциясының 14 бабына қайшы екенін атап өтті.

– Сол демократияшылдар ЛГБТ, феминизмге келгенде бәрін түсіне қалады. Ал мынаған келгенде түсінбейді. Қай жерде ұлтқа зиянды нәрсе бар, сол жерде жүреді... Сыртқы күштердің осындай ықпалына қарсы тұруға қауқар жоқ. Қабылдамасаң, әлемдік ұйымдардың бәлесіне қаласың, - деді Тілеухан.