Мәжіліс депутаттары аймақтардағы жұмысын бастады

Мәжіліс депутаттары аймақтарға жұмыс істеуге кетті. Олар сайлауалды бағдарламалардың іске асырылуын талдайды, қабылданған заңнамалық жаңалықтар туралы айтады, сондай-ақ аймақ пен оның тұрғындарына қатысты мәселелердің шешілуін бақылауға алады.

Бұл туралы Orda.kz хабарлайды.

Бірінші парламенттік сессияның соңында Мәжіліс төрағасы Нұрлан Нығматулин депутаттық корпустың назарын аймақтардағы жұмыстың маңыздылығына аударды.

Мәжілісмендер сайлауалды бағдарламалардың міндеттері жергілікті жерлерде қалай жүзеге асырылып жатқанын, өңірлердің өндірістік және ауылшаруашылық әлеуетін арттыру үшін қандай шаралар қабылданып жатқанын, халықтың әлеуметтік мәселелері қалай шешіліп жатқанын талдауға ниетті.

Ол үшін «Нұр Отан», «Ақ жол» партиялары ҚХА депутаттық тобы өндірістік нысандарды, денсаулық сақтауды, білім беруді, шаруа қожалықтарын аралап, мәселелерді талқылайды. Тек облыс орталықтарында ғана емес, шалғай елді мекендерде де азаматтармен кездесу өткізеді.

Сонымен қатар, мәжілісмендер қабылданған заңнамалық жаңалықтар туралы ақпарат береді.

Депутаттар барлық қойылған сұрақтарды, ұсыныстар мен мәселелерді қорытындылап, нақты шешімдер қабылдау үшін Үкіметке жіберуге, сондай-ақ оларды алдағы заң шығару жұмыстарында ескеруге ниетті.

Аймақтардағы депутаттардың жұмысы эпидемиологиялық жағдай мен санитарлық талаптарды ескере отырып ұйымдастырылатын болады.