Мәскеулік мүфти «Қара жұма» атауын өзгертуге қатысты пікір білдірді

Мәскеу мұсылмандары діни басқармасының төрағасы Ильдар Аляутдинов «Қара жұма» атын өзгертуге қатысты өз ойымен бөлісті.

Еске салсақ, Қазақстан мұсылмандары діни басқармасының (ҚМДБ) төрағасы, Бас мүфти Наурызбай қажы Тағанұлы сауда орталықтарының иелері мен кәсіпкерлерді «Қара жұма» сауда-саттық атауын «Жомарт жұма» деп өзгертуге шақырған. Ол Ислам дәстүріндегі «жұма» сөзінің қасиетті де қастерлі ұғым екенін түсіндірді. Мүфтидің айтуынша, жұма мұсылман қауымы үшін қасиетті күн болғандықтан, «Қара жұма» атауын «Жомарт» деп өзгерту көпшілік ислам дәстүрін ұстанатын қазақ халқына деген құрмет болар еді.

Аляутдиновтың айтуынша, «Қара жұма» тіркесі жаман мағынаға ие емес. Бұл дүкендер мен компаниялар өз тұтынушыларына барынша жеңілдіктер ұсынатын күн.

– Бірақ, сонымен бірге бұл сөз тіркесі, атап айтқанда «қара» сөзі жаман, арам, қорқынышты, қара күштермен байланысты. Осы тұрғыдан алғанда, Қазақстан мүфтиінің ұсынысында белгілі бір мағына болуы мүмкін. Болашақта бұл тіркесті өзгертуге болады, - деді Аляутдинов РИА Новостиге.

Қара жұма тарихы

Америка Құрама Штаттарының тұрғындары қараша айының соңында жылдың басты мерекелерінің бірі - Алғыс айту күнін атап өтеді. Тарихта осы күннен кейінгі жұма тұтынушылық сұраныстың өсуіне байланысты «Қара жұма» деп аталады. 2021 жылы Қара жұма 26 қарашаға келіп түсті.