Мәскеуде Навальныйға қатысты тағы бір қылмыстық іс қозғалуда

5 ақпанда Мәскеудің бітім соты «ар-намысты қорлау» бабы бойынша Навальныйдың үстінен қозғалған іс бойынша сот тыңдауын қайта жалғастырды.

Белсендіге 94 жастағы соғыс ардагері Игнат Артеменконың «ар-намысын қорлау үшін» қасақана түрде жалған ақпарат таратты деген айып тағылып отыр.

Бұған дейін сот процесі Навальныйдың уланып, емделу үшін Германияға кетуіне байланысты тоқтап қалған болатын.

ТАСС агенттігінің хабарлауынша, басқа қылмыстық іс бойынша қамауда болған Алексей Навальный сот отырысына жеткізілген. Сот ғимараты маңында қауіпсіздік күшейтілді.

Навальныйдың үстінен қылмыстық іс былтыр маусым айында қозғалған. Әлеуметтік желіде Навальный Конституцияға енгізілетін түзетулерді қолдап, RT телеарнасының үгіт-насихат видеосына түскен адамдарды «сатқын малайлар» деп атаған. Тергеу органы өкілдерінің айтуынша, бұл сөз видеоға түскен Артеменконың намысына тиген. Хаттамаға сәйкес, ол жазба туралы оған саяжайдағы көршісі хабарлаған. Бұдан соң ол өзін қарайтын адамға жазбаны көрсетуді сұраған. Артынша ардагердің жағдайы нашарлаған.

Навальный өзіне тағылған айыпты мойындамайды және қылмыстық істің саясиланғанын есертеді. Аталған бап бойынша оппозиционер миллион рубльге дейін айыппұл төлеуге немесе 240 сағатқа дейін жұмыс істеуге міндеттелуі мүмкін.

2 ақпанда Мәскеудің Симоновский соты Алексей Навальныйды түрмеге қамау туралы үкім шығарды. Саясаткердің 2014 жылы «Ив Роше» ісі бойынша алған шартты жазасы 3,5 жыл түрме жазасымен алмастырылды. Оппозиционердің 2014 жылы бірнеше ай үйқамақта болғаны ескерілгендіктен ол түрмеде 2 жыл 8 ай отырады.