Мәшһүр Жүсіп Қазақстан болашағын болжаған ба?

Әлеуметтік желіде Мәшһүр Жүсіптің Қазақстанның болашағына қатысты жасаған «болжамын» жиі тарай бастады.

Болжамда «70 жыл құдайсыз қоғам болатыны, сосын 30 жыл ұры-қарылар былықтыратыны, кейін қой үстіне бозторғай жұмыртқалаған заман орнайтыны» айтылған.

Factcheck-тің мәліметінше, болжам фейк.

– Мәшһүр Жүсіптің дәл осындай көріпкелдігі туралы айтқан беделді тарихшы не зерттеуші пікірі табылмады, ал Жүсіп Көпеевтің шөбересі бұл «болжамға» толық әрі нақты дәлел жоқ екенін жазған. Мұндай ақпаратты бөлісетін және тарататын медиа мен тұлғалар дереккөзді белгілемейді, бірақ кейде Серік Нұрмұратов, Бақытжан Сатершинов, Алмасбек Шағырбаевтың кітабына сілтейді. Біз дәл сол кітаптардан мұндай «болжамның» тарауына себеп болуы мүмкін тіркесті таптық, - делінген жазбада.

Филология ғылымдарының кандидаты , «Мәшһүрдің мұңы» романының авторы Серік Елікбай Factcheck.kz журналисіне, жұрт ішінде М. Жүсіп осындай болжам айтты деген аңыз бар екені рас, бірақ дәлелі жоқ екенін айтты.

– Мұндай пікір бар. Бірақ нақты дәлелі жоқ. Ұрпағы да айта алмайды. Еңбектерінің ішінде жоқ. Аңыз секілді. Ал егер, айтылып, жазылып, жойылып кетсе – амал жоқ, - деп жазды ол.