Мәйітхана директоры пара алып қана қоймай, ақша жымқырды

Алматы мәйітханасының директоры Бақытжан Әлібеков пара алып қана қоймай, мемлекеттік бюджеттен 4,5 млн теңгені жымқырды деп айыпталуда. Бұл туралы Сыбайлас жемқорлыққа қарсы күрес агенттігінің Алматы қаласы бойынша департаментінің баспасөз қызметі хабарлады.

– Алматы қаласындағы сыбайлас жемқорлыққа қарсы қызмет қалалық патоанатомиялық бюроның директоры Әлібековке қатысты тергеуді аяқтады.Ол 2020 жылы мемлекеттік сатып алу келісімшарты бойынша 4,5 млн теңге қаражат жымқырды. Ақшаны қолды ету үшін ол «Veritas Primus» ЖШС-н заңға қарсы болса да құрды, делінген хабарламада.

Сондай-ақ, Бақытжан Әлібеков алматылық кәсіпкерден Алматы қалалық патоанатомиялық бюросы салынып жатқан жаңа ғимаратқа медициналық құрал-жабдықтар жеткізуге қабылдау-тапсыру актілеріне қол қою үшін 14 млн теңге пара алды деп күдіктелуде.

– Қазіргі уақытта қылмыстық іс сотта. Күдікті Әлібековтің кінәсіне қатысты соңғы шешімді сот шығарады, деді Сыбайлас жемқорлыққа қарсы қызмет.

Еске салсақ, Алматы мәйітханасының директоры Бақытжан Әлібеков өткен жылдың қазан айында қамауға алынды. Кейіннен ол қажетті жабдықты қабылдағаны туралы актілерге қол қойғаны үшін пара алды деген күдікке ілінгені туралы хабарланды.