Мүфтият қабірді қайта ашуға рұқсат берді

Қазақстан мұсылмандары діни басқармасы шариғат және пәтуа бөлімі меңгерушісінің орынбасары Сансызбай Құрбанұлы шариғат бойынша қабірді қайта ашуға болатынын түсіндірді.

«Шариғатымызда қабірді бекер ашса, ол харам болады. Үлкен күнә болады. Қабір тек зәру жағдайда ғана ашылады. Мысалы, жерленген мәйіт жатқан жерді су басса, яғни мәйіт судың астында қалса немесе ол біреудің меншігіндегі жерде жерленсе, жер иелері «мына мәйітті алып кет» десе. Үшінші жағдай, қылмыстық істі анықтау үшін қабірді ашуға мәжбүр болса, бәрі соған келіп тірелсе, сонда ғана қабірді ашуға шариғатымыз рұқсат береді. Ал басқа жағдайда ондай зәрулік болмаса, қажеттілік тумаса жатқан мәйіттің қабірін ашу шариғатымызда харам, үлкен күнә» деді ол.

Еске салсақ, Алматыдағы бүлік кезінде оққа ұшқан азаматтар жер қойнына тапсырылғаннан кейін араға екі апта салып, сот шешімімен қайта қазып алып жатыр.

Марқұмдардың жақындары шарасыздықтан бейіт басын күзетуді қолға алған. Оған халық наразылықтарын білдірді.