Мәдениет министрлігі «Дикий Арманға» қатысты пікір білдірді

ҚР Мәдениет және спорт министрлігі Сербияның Белград қаласында өтіп жатқан бокстан әлем чемпионатында «Дикий Арман» атты қылмыскерлер беделдісі не істеп жүргені туралы айтты.

Бұл туралы Orda.kz хабарлады.

«Дикий Арман» лақап атымен танылған Арман Жұмагелдиевтің көмекшісі желіде тараған видеода оған ақшаға ұқсас бір буманы береді. Ал Жұмагелдиев боксшылармен қол алысып сол буманы спортшыларға ұстатады. Видеоның сипаттамасында «Дикий Арманның» турнирде жеңілген қазақ боксшыларына екі мың доллардан таратты деп жазылған.

Министрліктің айтуынша, бокстан Қазақстан ұлттық құрамасының кейбір спортшыларына ақша беру «бұл азаматтың жеке бастамасы». Жұмагелдиевтің Қазақстан бокс федерациясының да, Мәдениет және спорт министрлігінің де қызметкері емес екені түсіндірілді.

«Қазақстан бокс федерациясына спортшылардың дайындығы, қазақстандық бокс делегациясының басшылығы мен қолдауы және олардың Белградтағы байланысы жүктеледі. Федерацияның басшылығы мен жаттықтырушылар құрамы Сербияда орналасқан. Министрлік ресми сауал жолдады. Мәдениет және спорт министрлігі Ұлттық Олимпиада комитетімен бірлесе отырып, бокстан ұлттық құрамалардың спортшыларын сапалы дайындау үшін барлық жағдай жасады, деді министрліктің баспасөз қызметі.

Олардың айтуынша, бокстан ұлттық құраманың дайындығы, жаттығулары мен халықаралық жарыстарға 2019-2021 жылдарға бюджеттен 1,5 миллиард теңгеден астам (3,5 миллион доллар) бөлінген. Сондай-ақ, әртүрлі халықаралық жарыстар мен Олимпиада ойындарында жеңіске жету үшін, соның ішінде әлем чемпионаттарында келесі мөлшерде ақшалай төлемдер қарастырылған:

• 1 орын – 15 мың доллар;
• 2 орын – 7 мың доллар;
• 3 орын – 5 мың доллар.

Сондай-ақ олардың жаттықтырушылары келесі өлшемде:

• 1 орын – 10 мың доллар;
• 2 орын – 5 мың доллар;
• 3-орын – 3 мың доллар түрінде сыйақы алады.

Кейін Олимпиада чемпионы, бокстан мемлекеттік жаттықтырушы Бақтияр Артаев Арман Жұмагелдиевпен бірге түскен видеосын жариялады.

Еске салсақ, 2019 жылдың күзінде қылмыс әлемінің беделдісі Дикий Арман туралы ақпарат әлеуметтік желіде пайда болды. Ал осы жылдың жазында Нұр-Сұлтанда полиция қызметкерлері оны ұстап, Жұмагелдиевпен профилактикалық әңгіме жүргізген.