Мәдениет қайраткерлері Тоқаевтан Боранбаевқа араша сұрады

Мәдениет қайраткерлерi Елбасы Нұрсұлтан Назарбаевтың құдасы Қайрат Боранбаевқа қатысты тергеу iсiне араласуын сұрап, президент Тоқаевқа ашық хат жазды.

Ашық хатта мәдениет қайраткерлері президентке алғыстарын айтып, елдегі азаматтарға қатысты тергеу жұмыстары жүргізіліп жатқаны туралы жазған. Сондай-ақ, онда Қайрат Боранбаевтың қазақ мәдениеті мен өнерінің дамуына өз үлесін қосқан меценат екені атап көрсетілген.

«Біздер, төмендегі көрсетілген өнер өкілдері – қазіргі кезде басына іс түсіп, тергеліп жатқан Боранбаев Қайрат Советайұлының ісінің объективті түрде ашық және жеңіл болуына қамқоршы болуыңызды өтіне сұраймыз» делінген ашық хатта.

Ашық хатқа Роза Рымбаева, Байғали Серкебаев, Дильназ Ахмадиева, Сүндет Байғожин, т.б. өнер өкілдері қол қойған.

Еске салсақ, Қаржы мониторингі агенттігі квазимемлекеттік секторда аса ірі мөлшерде қаражат ұрлау фактісі бойынша Боранбаев Қайрат Советайұлына қылмыстық іс қозғаған болатын.