М. Әуезов атындағы университеттің ректоры екі айға қамауға алынды  

М. Әуезов атындағы Оңтүстік Қазақстан университетінің ректоры Қайрат Нұрманбетов екі айға қамауға алынды. Бұл ақпаратты Orda.kz тілшісіне Шымкент сотының баспасөз қызметі растады.  

Нұрманбетов 28 миллион теңге көлемінде пара алды деген күдікке ілінді. Ректор мен оның орынбасарлары бұл ақшаны университетке жиһаз бен құрал-жабдық жеткізумен айналысатын тендер жеңімпазы атанған компания қызметкерінен алған. Жаңартылған білім ордасын жөндеуден кейін жаңа парталар, орындықтар және басқа да жиһаздармен жабдықтау жоспарланған еді.  

«Шымкенттің мамандандырылған тергеу соты күдікті Қайрат Нұрманбетовке қатысты 2024 жылғы 18 қыркүйектен бастап 2024 жылғы 18 қарашаға дейін екі айға «қамауда ұстау» түріндегі бұлтартпау шарасын санкциялады, кепіл мөлшері белгіленген жоқ»,  деп хабарлады баспасөз қызметі.

М.Әуезов атындағы Оңтүстік Қазақстан университетінің ректоры Қайрат Нұрманбетовтың қамауға алынғаны туралы 2024 жылғы 19 қыркүйекте белгілі болды.