Ұлытаудағы дала өрті толық сөндірілді

Желіде ауыр жұмыс күнінен кейін шаршап, демалып жатқан өрт сөндірушілердің фотосы тарады. Суретте Қарағанды облысының Ұлытау ауданында орын алған дала өртін сөндірген қызметкерлер.

Бұл туралы Orda.kz. хабарлайды.

Aibat жаңалықтар қызметі суреттегі қызметкерлерді қаһарманға теңеген.

8 шілде күні Қарағанды облысы аумағында дала өртінің барлық ошақтары жойылды.

Өртті сөндіруге 540 адам мен 70 техника жұмылдырылды. Алғашқы күндері күшті жел салдарынан төтенше жағдай орын алды. Ол басылған кезде ең үлкен ошақтарды оқшаулауға мүмкіндік туды.

Ірі қара малдың өліміне әкелген өрт туралы хабарлама 4 шілдеде пайда болды. Облыстық ТЖД Ұлытау ауданы аумағындағы 12 табиғи өрт ошағы және жалпы ауданы 263 гектар болатын 10 дала өртінің бақылауға алынғанын хабарлады. Салдарынан 200 бас ірі қара мал қырылды.

Сондай-ақ далада ер адамның көлігі мен күйген денесі табылды. Кейін марқұмның туыстары жігіттің есімі Бейбарыс Ескендір екенін, ол құтқарушылыққа оқып, туған ауылына жақын жерде өртті сөндіруге өз еркімен барғанын хабарлады.