Ұлытау облысының әкімі тағайындалды

Мемлекет басшысының Жарлығымен Берік Әбдіғалиұлы жаңа Ұлытау облысының әкімі болып тағайындалды, деп хабарлайды Ақорда.

«Әбдіғалиұлы Берік Ұлытау облысының әкімі болып тағайындалсын»  делінген құжат мәтінінде.

Берік Әбдіғалиұлы бұл  тағайындауға дейін Қазақстан Республикасы Парламенті Мәжілісінің депутаты болды. Ол 1971 жылы 18 қыркүйекте Қарағанды ​​облысы, Ұлытау ауданы, Терісаққан ауылында дүниеге келген. Бұған дейін Қарағанды ​​облысы Ұлытау ауданының әкімі болған (10.2019-01.2021).

Президент Әкімшілігінің басшысы Мұрат Нұртілеу Ұлытау өңіріндегі барлық деңгейдегі мәслихаттар отырысына қатысу үшін жұмыс сапарымен Жезқазған қаласына барды.

«Мұрат Нұртілеу депутаттарға президенттің Ұлытау облысының әкімі лауазымына екі кандидатты - Әбдіғалиұлы Берік пен Шайдаров Серік Жаманқұлұлын қарауды ұсыну туралы хатын оқып берді. Ашық дауыс берудің қорытындысы бойынша 64 депутаттың ішінен Ұлытау облысы әкімінің лауазымына екі кандидатты ұсынды. Берік Әбдіғалиұлының кандидатурасына 51 депутат, Серік Шайдаровқа 13 депутат дауыс берді» делінген хабарламада.

Облыс құрамына Жаңаарқа, Ұлытау аудандары мен үш қала – Жезқазған, Қаражал және Сәтбаев кіреді.

Еске салайық, 8 маусымда ҚР Президентінің 4 мамырдағы еліміздің жаңа өңірлерін құру туралы жарлығы күшіне енген болатын.