Құлыбаев Нұр-Сұлтанда шетелдік инвесторлар кеңесінің отырысына қатысты

Шетелдік инвесторлар кеңесінің отырысы аясында экс-президент Нұрсұлтан Назарбаевтың күйеу баласы Тимур Құлыбаевқа оның алдағы жоспарлары туралы сұрақ қойылды.

Видеоны «Выход к правде» instagram-парақшасы жариялады.

Құлыбаев тоқтап, журналистерге жауап берді.

– Құрметті әріптестер! Осындай маңызды сұрақтарды жүріп келе жатқанда қоясыздар, – деді күлімсіреп Құлыбаев.

Ол бұл сөзден басқа артық ештеңе айтпаған.

Тимур Құлыбаев 9 маусымда президент Қасым-Жомарт Тоқаевтың төрағалығымен өткен шетелдік инвесторлар кеңесінің отырысына қатысты. Шараға ірі трансұлттық компаниялардың, мемлекеттік органдардың басшылары мен халықаралық ұйымдардың өкілдері қатысты. Назарбаевтың күйеу баласының қандай қызметте және не үшін қатысқаны айтылмаған. Бұған дейін ол соңғы рет 21 қаңтарда президент Тоқаев кәсіпкерлермен кездесу өткізген кезде көпшілік алдына шыққан.

Қаңтардағы наразылық басылғаннан кейін Тимур Құлыбаев «Атамекен» ҰКП басшысы қызметінен кетті. Одан кейін ол палата жұмысының басты нәтижесі бизнес пен үкімет арасындағы қалыптасқан сындарлы диалог, қолайлы бизнес-климатты дәйекті қалыптастыру екенін атап өтті. Одан кейін Елбасының тағы екі күйеу баласы – Шәріпбаев пен Досановтың ұлттық компаниялардағы қызметтерінен кеткені хабарланды.

Құлыбаев Назарбаевтың ортаншы қызы Динараның жолдасы.