Лукашенко Украинадағы жағдай бойынша шұғыл мәлімдеме жасады

Беларусь президенті әскерилермен өткен жедел кеңесте Украинадағы жағдай бойынша шұғыл мәлімдеме жасады.

РИА новостидің хабарлауынша, Александр Лукашенко «Беларусь әскерлері Ресейдің Украинадағы операциясына қатыспайды, бірақ қажет болған жағдайда жіберілуі мүмкін» деп айтқан.

«Бұл қақтығысқа біз қатысамыз, не қатыспаймыз деп қазір жауап бере алмаймын. Дәл қазіргі сәтте біздің әскер ол қақтығыста жоқ. Бірақ алдағы уақытта Беларусь пен Ресейге қажет болса барады, қақтығысқа қатысады» деді Лукашенко.

Оның айтуынша, Украина соғысты өзі тілеп алған, оны алдын алу үшін ештеңе жасамаған.

«Бұқаралық ақпарат құралдарынан жасырылған барлық дерек олардың бұл қақтығысты қалағанын айғақтайды. Себебі оны болдыртпау үшін ешнәрсе істемеді. Олар онсыз да шиеленіскен нәрсені үнемі одан ары шиеленістіре түсті. Тіпті бұл республикалар тәуелсіздігін мойындағаннан кейін де болып отыр» деді ол.

Лукашенко сондай-ақ Украина Ресейдің талабын орындау керектігіне сенім білдірді.

«Иә, талаптар Украинаға қатысты қатал болады. Егер жеңіліп қалса, не болады? Әрине, жеңімпаз өз талабын айтады. Бұл жағдайда Украина үшін бір талапты орындау, жеңілгенінен әлдеқайда жақсы болады» деді Беларусь президенті.

Еске салсақ, бүгін, 24 ақпанда Ресей президенті Владимир Путин Украинаға қарсы соғыс бастады. Артынша Укриана президенті Владимир Зеленский елде соғыс жағдайын енгізді.