Ұлттық банк айырбастау орындарына  82 келі алтын сатты

Ақпан айында Қазақстанның Ұлттық банкі жалпы салмағы 82 келі болатын 2586 алтын құйма сатты.

Алтынды екінші деңгейлі банктер мен жекелеген банктік емес айырбастау пункттері сатып алды.

Қазіргі уақытта қаржы нарығындағы тұрақсыздық пен валюта бағамының құбылмалылығының күшеюі жағдайында алтын құймаларына инвестиция салу Алматы, Нұр-Сұлтан және Атыраудағы айырбастаушылар арасында танымал болып отыр.

— Алтын құймалар нарығының өтімділігін қамтамасыз етудің негізгі факторы банктердің және банктік емес айырбастау пункттерінің клиентке «сол күні» ақша төлей отырып, құймаларды сатып алу мүмкіндігі болып табылады, - деді қаржы реттеушісі.

Алтын құймалар бес түрлі салмақта ұсынылған: 5, 10, 20, 50 және 100 грамм. Сатып алушылар арасында ең танымал - салмағы 10 грамм болатын құйма.

Халық үшін тазартылған алтынның (қоспалардан тазартылған – ред.) өлшенген құймаларын сату және қайта сатып алу бағдарламасын Ұлттық банк 2017 жылы іске қосты. Іске қосылғаннан бері жалпы салмағы 2,9 тонна болатын 79 262 алтын құймасы сатылған.

Қазіргі уақытта алтын құймаларын Халық банкінде, Еуразиялық банкте, Жусан банкте, ЦентрКредит банкінде, сонымен қатар таңдаулы банктік емес айырбастау пункттерінде сатып алуға және сатуға болады.