Лос-Анджелесте жойқын өрт: жел өртті өршіте түсті, құрбандар саны өсуде

NBC News арнасының хабарлауынша, Лос-Анджелесте қаза тапқандар саны 16 адамға жеткен. Сенбі күні жел бағытын өзгертіп, жалынды шығысқа, Брентвуд пен Энсиноға қарай айдады, деп хабарлайды Orda.kz.

Лос-Анджелестің алты аймағында жойқын өрт 37 мың акр (15 мың гектарға жуық) жерге тарап, бүкіл елді мекен мен 12 мыңнан астам ғимаратты қиратты.

Лос-Анджелес округінің шерифі Роберт Луна кем дегенде 13 адам із-түзсіз жоғалып кеткенін мәлімдеді. Хабар-ошарсыз кеткендердің өртке қатысы бар-жоғы белгісіз.

Ал, куәгерлердің айтуынша, қала үстін өрттің қою түтіні басқан.

Los Angeles Times газеті осы аптада Лос-Анджелестің бір бөлігін жайпаған ең ауқымды орман өртінің сенбі күні жел әсерінен бағытын өзгерткенін жазды.

Қаланың батыс шетіндегі Палисейдс ауданындағы өрт қазір Брентвуд пен Сан-Фернандо алқабы етегіне қарай жылжуда. Жергілікті билік эвакуация туралы кезекті бұйрық шығарды. Өрт сөндіру бөлімдері қызу жұмыс істеп жатыр.

Жел бағытын өзгерткенге дейін өрт сөндірушілер Палисейдс пен Итон аудандарында өртті ауыздықтауда барысы туралы хабарлады. Palisades өрті жұмаға қараған түні 8%, ал Итон өрті 3% болды, деп хабарлайды Cal Fire мемлекеттік агенттігі.

Қою, улы түтінге байланысты жергілікті билік те төтенше жағдай жариялады. Өрт кезінде ауаға металдардың, пластмассалардың және басқа да синтетикалық материалдардың түтіні тараған.

Лос-Анджелес шерифі Роберт Луна іздеу-құтқару операциясы барысында құрбандар саны арта түскенін айтты.

Калифорнияның бірқатар аудандарында тонаушылар әрекет ете бастады. Олармен күресу үшін полиция зардап шеккен аудандарда сағат 18:00-ден 6:00-ге дейін коменданттық сағат енгізді.

«Зардап шеккен аймақтарда қалуға рұқсат етілмейді. Егер кімде-кім ол жерге барса, бірден қамауға алынады. Бұл коменданттық сағат қатаң түрде орындалады», - деді шериф Роберт Луна.

Калифорнияда 73 қазақстандық, оның ішінде «Болашақ» бағдарламасының 56 қатысушысы және «Ғылыми тағылымдама» бағдарламасының 17 тағылымдамашысы бар. «Халықаралық бағдарламалар орталығы» АҚ қазақстандық студенттерге қауіп жоқ екеніне сендірді.