Лондонда Уәлихановтың ағылшын тіліндегі шығармалар жинағы таныстырылды

Лондондағы Кембридж университетінің баспасы көрнекті қазақ ғалымы, этнолог, географ, картограф және суретші Шоқан Уәлихановтың ағылшын тіліндегі тұңғыш таңдамалы жинағының тұсаукесерін өткізді. Бұл туралы Хабар агеттігі хабарлады.

Кітап Қазақстанның Ұлыбританиядағы Елшілігімен серіктестікте Қостанай облысының әкімдігі мен Ұлттық аударма бюросының қолдауымен жарық көрді. Іс-шара Ұлыбританияның әйгілі Корольдік Географиялық Қоғамының қабырғасында өтті және онлайн режимінде таратылды. Оған әлемнің түкпір-түкпірінен жүздеген қонақтар қатысты.

Тарихи және ғылыми құндылығына қарамастан, Шоқан Уәлихановтың шығармалары ағылшын тілді әлемде әлі де кең танымал болмаған.

Кітапқа Шоқан Уәлихановтың Орталық Азияның географиясын, тарихын, этнологиясын және экономикасын зерттеуге арналған ең маңызды ғылыми еңбектері енген. Шоқан Уәлиханов атындағы Тарих және этнология институты аудармаға материалдарды іріктеу кезінде қазақтардың және басқа аймақтағы халықтардың тарихын, дәстүрлері мен әдет-ғұрыптарын, қазақтың сот жүйесін сипаттайтын мақалаларға, сондай-ақ автордың демократиялық көзқарастарын, оның ішінде халық үшін салыстырмалы түрде пайдалы реформаларды сипаттауға тырысқан.