Лондонда Палестина туын ұстаған ер адам Биг Бенге шығып алып 16 сағат отырды

Белсенді Вестминстер сарайының сағат ілінген мұнарасына шығып алып, палестиналықтарды қолдайтын ұран айтып, оның бәрін өз телефонына түсіріп, бірден интернетке жариялады, деп хабарлайды Orda.kz Sky News арнасына сілтеме жасап.

Таңертең сағат ілінген биік мұнараға жалаңаяқ ер адам шықты. Төтенше жағдайлар қызметкерлері оны төмен түсуге көндірмек болды, бірақ нәтиже болмады. Оқиға орнына полиция шақырылды. Оқиғаға орай Вестминстер көпірінің солтүстік бөлігінде көлік қозғалысы жабылды.

«Лондон полициясының қызметкерлері оқиға орнында қауіпсіздік жұмыстарын жүргізіп жатыр» деп жазылған хабарламада.

Өрт сөндірушілер мен жедел жәрдем қызметкерлері белсендіні 10 метрлік биіктіктен түсуге көндіруге тырысып, Биг Бен маңында орнатқан лифтпен оған көтерілген.

Палестина туын желбіретіп, оған бостандық талап еткен жас жігіт наразылық білдіріп 16 сағат бойы биікте отырды.

«Ер адам қазір қамауға алынды. Оқиға ер адам отырған жерде адамдардың көп жүретіндігіне және біздің офицерлердің, жеке тұлғалардың және жалпы қоғамның қауіпсіздігін қамтамасыз ету қажеттілігіне байланысты ұзаққа созылды» деп жазады Independent басылымы полицияға сілтеме жасап.

Басылымның хабарлауынша, құтқарушылар мен келіссөз жүргізушілер оны үшінші рет түсуге көндіру әрекетінен кейін жергілікті уақыт бойынша түнгі сағат 05:00 шамасында  ер адамды күштеп түсіріп,  алып кеткен.

Биг Бен - Вестминстер сарайының сағат мұнарасы, Ұлыбританияның басты символдарының бірі. Оның биіктігі 96 метр.