«Листвяжная» шахтасының иесі апаттан кейін қамауға алынды

Ресейде «Листвяжная» шахтасы иелерінің бірі, миллионер Михаил Федяев қамауға алынды.

Федяев 2022 жылдың 14 ақпанына дейін қамауға алынды. Ол ауыр зардаптарға әкеп соқтырған билікті асыра пайдаланды деп айыпталуда.

Кеніш «Сібір бизнес одағы» холдингінің құрамына кіретін «СДС-Уголь» компаниясына тиесілі. СДС компаниясының  тең құрылтайшысы және президенті Федяев. Forbes оның байлығын 550 миллион долларға бағалайды.

 «СДС-Уголь» бас директоры Геннадий Алексеев пен техникалық директоры Антон Якутов, сондай-ақ шахтаның бас инженері Анатолий Лобанов 2022 жылдың 25 қаңтарына дейін қамауға алынды. Олар абайсызда адам өліміне әкеп соқтырған қауіпті өндірістік нысандардың өнеркәсіптік қауіпсіздік талаптарын бұзды деп айыпталуда.

Шахтадағы жарылыс 25 қарашада болып, 51 адам қаза тапты. Тергеу апаттың себебі – метанның жарылғыш концентрациясының жиналуы деп санайды.