Лисаковскідегі бала зорлағыш өмірінің соңына дейін түрмеге тоғытылды

Қостанай облысының қылмыстық істер жөніндегі мамандандырылған ауданаралық соты жабық режимде үкім шығарды, істің егжей-тегжейі жарияланбады, деп хабарлайды Orda.kz Tobolinfo-ға сілтеме жасап.

Ер адам ҚР ҚК 121-бабының 4-бөлігі («Кәмелетке толмаған балаға қатысты нәпсіқұмарлық сипаттағы күш қолдану») бойынша кінәлі деп танылды. Ол өмір бойы түрмеге кесілді.

Жұрттың жағасын ұстатқан қылмыс туралы наурыз айында белгілі болды. «Не молчи» қоры ер адамның 13 жасар өгей қызын бір жылға жуық зорлағанын хабарлады. Ұйымның мәліметінше, сотталған адам  - Лисаковскіге танымал бизнесмен. Ол тіпті 2020 жылы қалалық мәслихат депутаты болған.

 Еске салсақ, 2024 жылдың тамыз айында Жетісу өңірінде педофиль үйге кіріп, 12 жасар қызды зорлаған. Алайда сот күтпеген жерден сотталушының әрекетін қылмысқа оқталу ретінде қайта саралап, 15 жылға бас бостандығынан айырды.