«Әліппе» оралды. 1-сынып оқушыларының оқу бағдарламасы өзгерді

1 қыркүйекте жаңа оқу жылына арналған салтанатты жиындарда бірінші сынып оқушыларына «Әліппе» беріледі. Бұл туралы ҚР Білім және ғылым министрі Асхат Аймағамбетов мәлімдеді.

Бұл туралы Orda.kz хабарлады.

Министр биыл «Әліппе» оқу бағдарламасына оралатынын еске салды.

– 1 қыркүйекте бізде дәстүрлі салтанатты жиындар өтеді. Онда біз мектеп табалдырығын алғаш аттаған оқушыларымызға «Әліппені» тапсыруымыз керек. Бұл өте жақсы дәстүр. «Әліппе» - баланың алғашқы кітабы, барлық кітаптар дайын, тек дер кезінде табысталуы керек, - деді министр.

Асхат Аймағамбетов Қазақстанның әдіскерлері Ахмет Байтұрсыновтың 1912 жылы жазған кітабы бойынша «Әліппенің» жаңа нұсқасын дайындауда үлкен жұмыс жасалғанын еске салды.

– «Әліппе» оқулығын жазу кезінде негізгі техникалық принциптер сақталды. Бұл дыбыстармен жұмыс, «қарапайымнан күрделіге» принципі. Барлық бағдарлама балалардың жас ерекшеліктеріне сәйкес келеді, - деп қосты Аймағамбетов.

Айта кетсек, бірінші сынып оқушылары бірінші және екінші тоқсанда «Әліппе» (орыс мектептерінде «Букварь») оқитын болады. Үшінші тоқсаннан бастап балалар «Ана тілі» кітабы бойынша ана тілін үйрене бастайды.

Білім министрлігінің кестесіне сәйкес, Қазақстанның барлық мектептері 20 тамызға дейін оқулықтарды алуы тиіс. Жұмысты әр облыстың білім бөлімдері қадағалайды.