Лифтіде 10 жасар балаларды аяусыз тепкілеген ер адам ұсталды

Әлеуметтік желілерде Алматылық ер адамның 10 жасар балаларды ұрып, тепкілеген бейнежазбасы тарап кетті.

Онда ер адамның лифтте 10 жастағы балаларды соққыға жығып жатқаны анық көрінеді. Ер адам «біреу келе жатқан жоқ па?» дегендей айналасына жалтақтап қарап қойып, балаларды тепкілей береді.

Осы мәселеге қатысты Orda.kz Алматы қалалық полиция басқармасына хабарласты. Басқарманың баспасөз қызметі бұл оқиғаға қатысты тергеу жүргізіліп жатқанын айтты.

«Аталған дерек бойынша тергеу амалдары жүргізілуде. Ер адам анықталып, полицияға жеткізілді. Оның әрекетіне құқықтық баға берілетін болады. Басқа  да мән-жайлары анықталып жатыр», — деді полиция басқармасы.