«Үлгілі қыз болатын». Шымкентте 5 қабаттан құлап кеткен қыз қайтыс болды

Шымкентте бір күн бұрын 5-қабаттың терезесінен құлап кеткен 16 жастағы қыз көз жұмды.

Отырар басылымының хабарлауынша, көршілері жасөспірімнің «үлгілі, иманды» қыз болғанын айтқан.

Бір күн бұрын Шымкентте 16 жастағы қыз 5 қабаттың терезесінен құлап кеткен. Дәрігерлер зардап шегушіні өте ауыр жағдайда ауруханаға жатқызды. Бірақ жасөспірімді құтқара алмады, ол жансақтау бөлімінде қайтыс болды.

«Әлі де есімізді жимадық. Өзімізге келе алмай жатырмыз. Қатты уайымдадық. Мен бұл отбасын жеке танимын. Ата-анасының өзі өте білімді, ішпейді, темекі шекпейді. Көпбалалы отбасы. Марқұм қыз намаз оқып, хиджаб киетін» дейді көршісі.

Дәрігерлердің айтуынша, қыз ауруханаға түскеннен кейін комаға түскен, көптеген жарақаттар алған. Үлкен биіктіктен құлаған қыз 12 сағаттан соң көз жұмған.

«21 желтоқсан күні сағат 11:15-те 2005 жылы туған науқас қайтыс болды. Оған бас миының ашық жарақаты, ауыр бас миының контузиясы, бассүйек ішілік гематома, бас миының ісінуі, жабық ығысқан жамбас сүйегінің сынуы, құрсақ қуысының доғал жарақаты және ауыр травматикалық шок диагнозы қойылды» деді Шымкент қалалық денсаулық сақтау басқармасының баспасөз хатшысы Лаура Нахипова.

Полиция департаменті оқиға туралы нақты ақпарат бермеді. Олар өз-өзіне қол жұмсау фактісі бойынша сотқа дейінгі тергеу жүріп жатқанын ғана атап өтті.

«Оқиға Қаратау аудандық полициясына ҚР Қылмыстық кодексінің 105-бабы бойынша тіркелді» деді полиция департаментінде.

Еске салсақ, Шымкентте 16 жастағы қыз бесінші қабаттағы пәтердің терезесінен құлап кеткен болатын. Оқиға 20 желтоқсанда «Асар-2» шағын ауданында болған.