Әлемдегі ешқандай күш мені бұл елден кетуге көндіре алмайды – Ашраф Ғани

Ауғанстан экс-президенті Ашраф Ғани осы жылдың мамырында шыққан «Der Spiegel» басылымына берген сұхбатында талибандармен күрес туралы бөліскен болатын.

Бұл туралы Orda.kz хабарлады.

Сұхбат кезінде АҚШ-тың Ауғанстан үкіметінсіз талибандармен келіссөз жүргізгені туралы да ойларымен бөлісті.  

- Байден әкімшілігі стратегиялық шешім қабылдады. Олар өз мүдделерін бағалады. Мен бұл шешімді құрметтеймін. Ашудан нәтиже шықпайды. Мен өзім ешқашан АҚШ-тың шығарылуына қарсы болған емеспін. Бірақ, өкінуге де уақыт жұмсамаймын, - деді Ғани.

Әрі қарай, Ғани Талибанға* Пәкістан әсер ететінін, бұл соғыстың Кеңес Одағымен ұқсастығын, тәліптермен бейбітшілік келісімге неге бара алмайтынын, 20 жыл бойы құрылған мемлекеттің жоғалу мүмкіндігін, Ауғанстан тұрғындарының босқын болып кетуі туралы айтты.

Сұхбат соңына қарай, «Der Spiegel» журналисті Ғаниден:

Сіз өз еліңіздің болашағына қаншалықты сенімдісіз? Егер бәрі дұрыс болмай қалса, сіз Кабулдан соңғы ұшақпен ұшуға тура келеді деп қорықпайсыз ба?, - деп сұрады.

Оған Ауғанстанның экс-президенті:

- Мен өлімге дейін бір ғана оқ бар екенін білемін. Менің өміріме көп қастандық жасалды. Мен мұнда төңкеріс нәтижесінде келген жоқпын. Мені халық сайлады. Мені ешқашан американдық күзетші немесе танк қорғаған емес. Президент болғанға дейін мен 28 жыл шетелде тұрып, табысты мансап жасадым. Бірақ мен бақытты емес едім. Әлемдегі ешқандай күш мені ұшаққа отырып, осы елден кетуге көндіре алмады. Мен бұл елді жақсы көремін және оны қорғап өлемін, - деген болатын Ғани.

Естереріңізге сала кетейік, Ашраф Ғани Кабулға «Талибан» қозғалысының енуіне байланысты президенттік өкілеттігін тоқтатып, елден кетті. Қазіргі таңда Ауғанстанның экс-президенті отбасымен Біріккен Араб Әмірліктерінде.

Талибан* – Қазақстанда, Ресейде және басқа да бірнеше елдерде тыйым салынған террористік ұйым.