Әлемдегі ең қымбат футболшы кім?

Халықаралық спорт зерттеу орталығы (CIES Football Observatory) Еуропаның жетекші бес лигасында ойнайтын ең қымбат футболшылардың рейтингін жариялады.

«Манчестер Юнайтед» клубының ойыншысы Маркус Рэшфорд рейтингтегі тізімді бастап тұр. Бұл ойыншы 165,6 миллион еуроға бағаланыпты. Екінші орындағы «Боруссия Дортмунд» шабуылшысы Эрлинг Холландтың құны 152 миллион еуро. «Ливерпульдің» қорғаушысы Трент Александр-Арнольд - 151,6 миллион еуроға бағаланып, алғашқы үштікті қорытындылаған. Ал, Киллиан Мбаппе болса, былтырғы рейтингте бірінші орында тұрған болатын. Ол биыл бесінші орынды қанағат етіпті.

Жетекші футболшылар жас ойыншыларға қарағанда соңғы жылдары айтарлықтай төмен рейтинг көрсетуде.

Мәселен, Лионель Месси тізімде тек 97-ші орында тұр. Оның құны 54 миллион еуроға бағаланған. Тіпті  «Ювентустың» шабуылшысы Криштиану Роналду мен «Пари Сен-Жермен» (ПСЖ) Француз клубының шабуылшысы Неймар алғашқы жүздікке де ілінбеген.

Ең қымбат 10 ойыншының қатарына Боруссиядан Джейдон Санчо (148,3 миллион евро), Атлетикодан Джоау Фелиш (141,5 миллион евро), Бавариядан Альфонсо Дэвис (139,2 миллион евро), Манчестер Ситиден Рахим Стерлинг (136,9 миллион евро) және Челсиден Кай Хаверц (136 миллион евро) кірді.