Әлем ядролық соғыстың аз-ақ алдында тұр – Назарбаев

Астана клубы отырысында Елбасы Нұрсұлтан Назарбаев пікірталас алаңы халықаралық аренада беделді саясаткерлерді, дипломаттарды және әлемдік деңгейдегі сарапшыларды біріктіретін алаң ретінде бірегей орнын алғанын атап өтті.

– Биыл Қазақстан өз тәуелсіздігінің 30 жылдығын атап өтуде. Мен үшін қазіргі қазақ мемлекетінің құрылуы мен қалыптасу үдерісіне жетекшілік ету құрметін халық сеніп тапсырған еліміздің тұңғыш Президенті ретінде бұл – мерейлі кезең. Өздеріңіз білетіндей, тарихи тұрғыдан алғанда қысқа уақыт ішінде Қазақстан өз дамуында маңызды табыстарға қол жеткізді. Белсенді, көпвекторлы және бейбітшілік саясатын жүргізе отырып, біз халықаралық кеңістікте лайықты орын алдық, - деді Елбасы.

Elbasy.kz мәліметінше, Нұрсұлтан Назарбаев өз сөзінде әлемдік сын-қатерлер мен қазіргі заманның жаһандық қауіп-қатерлеріне, соның ішінде коронавирустың таралуына, әлемдік державалар арасындағы қарама-қайшылықтың күшеюіне, Ауғанстан төңірегіндегі жағдайға және ядролық стратегиялық тұрақтылық саласындағы күрделі жағдайға ерекше назар аударды.

– Әлем ядролық соғыстың аз-ақ алдында тұр. Әлемде қазір дағдарыстық жағдай. Бұл Үлкен Еуразиядағы ынтымақтастықтың жаңа тәсілдерін әзірлеуді талап етеді, – деді Назарбаев.

Сонымен қатар, Нұрсұлтан Назарбаев Еуразиялық экономикалық одақ, Еуропалық одақ, Шанхай ынтымақтастық ұйымы және жақында құрылған Түркі мемлекеттері ұйымы арасындағы тікелей байланыстарды дамытуды ұсынды. Ол үшін төрт жақты «Үлкен Еуразия» экономикалық форумын құру керек деп санайды.