Әлем чемпионатының іріктеу кезеңі: Қазақстан Украинамен тең түсті

Футболдан Қазақстан құрамасы 2022 жылғы әлем чемпионатының іріктеу кезеңінде өз алаңында Украинамен тең ойнады.

Бұл туралы Orda.kz Prosports.kz сайтына сілтеме жасап хабарлайды.

Нұр-Сұлтанда өткен кездесу голмен басталды. 2-минутта Роман Яремчук алыстан дәл соққы жасап, есеп ашты. Үзіліске дейін украиналықтардың есепті ұлғайтатын мүмкіндігі болды, бірақ кей тұста Стас Покатилов, кей сәтте қақпа бағанасы құтқарып қалды.

Ойынның екінші бөлігінде қазақстандықтар белсенділік танытты. 68-минутта Абат Айымбетов таразы басын теңестірген, алайда төреші голды есептеген жоқ – офсайд.

74-минутта Асхат Тағыбергеннің алаң ортасынан берген пасын әдемі қабылдаған Руслан Валиуллин есепті теңестірді – 1:1.

Ойын соңына қарай Данила Сикан украиналықтарды алға шығарды. Бірақ, қазақстандықтар соңғы секундтарда тағы бір гол соғып, таразы басын теңестірді.