Әлем чемпионатында Қазақстанның бұрынғы әнұраны қосылды

Испанияда өтіп жатқан гандболдан 2021 жылғы әлем чемпионатында Қазақстан мен Иранның әйелдер құрамалары арасындағы матч алдында күтпеген жағдай орын алды.

Ұйымдастырушылар Қазақстанның қазіргі әнұранының орнына ескі әнұранды қосып қойды.

Sports.kz хабарлағандай, алдымен қазақстандық гандболшылар түсінбей қалғанымен, артынша тез жағдайға бейімделіп, Қазақстанның қазіргі әнұранын ешқандай сүйемелдеусіз, қолдарын сол жақ кеудесіне қойып айтып берді.

Ойынға келер болсақ, Қазақстан құрамасы Иран құрамасын 31:25 есебімен жеңіп, әлем чемпионатының негізгі кезеңіне шықты.

Бұл Қазақстан әнұранымен болған алғашқы жағдай емес. Мысалы, 2017 жылы Сочидегі спортшы Есет Қуановты марапаттау рәсімінде ескі әнұран қосылған. Жанкүйерлер мен құрама мүшелері қазақстандықты қолдап, әнұранды музыкасыз шырқады.

2014 жылы хоккейден Қазақстан жастар құрамасының Венгриядағы жеңісінен кейін турнир ұйымдастырушылары да Қазақстанның ескі әнұранын қосқан.

2012 жылы Кувейтте өткен спорттық жарыстарда Қазақстан туы көтерілген кезде әнұранның орнына «Борат» фильмінің музыкасы қосылды.