LED-экрандағы Украина туы: Техникалық ақау ма, әлде хакерлік шабуыл ма?

Владимир Путиннің Астанаға сапары күні LED-экранда Украина туының пайда болуына қатысты полиция тергеу бастады, деп хабарлайды Orda.kz.

27 қараша күні Ресей президенті Владимир Путиннің Астанаға мемлекеттік сапары барысында әлеуметтік желілерде «Астана Опера» театры жанындағы LED-экранда Ресей туының орнына Украина туының пайда болғаны туралы бейнематериалдар тарады.  

Желіде бұл жағдайға хакерлердің экран жүйесін бұзуы себеп болды деген болжамдар айтылған болатын. Алайда, «Керуен Медиа» компаниясының өкілдері Ресей туының Украина туының түстеріне «боялуын» кабельдің қысқа тұйықталуымен түсіндірді.  

Ішкі істер министрлігі oқиғаға қатысты тергеу басталғанын айтты.

«Кеше «Керуен Медиа» ЖШС-не қатысты орын алған оқиға бойынша тергеу басталды. Қазіргі уақытта барлық мүмкін нұсқалар, соның ішінде техникалық ақаулар мен экранның жұмыс істеу процесіне сыртқы заңсыз араласу ықтималдығы қарастырылуда. Қылмыстық іс қозғалды», – деп жауап берді   баспасөз қызметі.

Министрлік оқиғаның барлық мән-жайы анықталатынын және кінәлілер табылған жағдайда жауапкершілікке тартылатынын мәлімдеді.