Құлдықта болған Қазақстан мен Өзбекстан азаматтарының шағымын Еуропа соты тексереді

Еуропаның Адам құқықтары жөніндегі соты Мәскеуде құлдықта болған Қазақстан мен Өзбекстан азаматтарының шағымдарын қарастыратынын мәлімдеді.

Бұл туралы  Orda.kz Азаттыққа сілтеме жасап хабарлайды

Сот бес жәбірленушінің екі шағымын бірге қарамақшы. Алғашқы шағым қазақстандық Фатима, Әлия Мұсабаевалар мен өзбекстандық Гүлжанар Назанова, Бакия Қасымовадан 2016 жылы түскен. Осындай шағым 2018 жылы қазақстандық Несібелі Ибрагимовадан келген.

 «Мемориал» құқық қорғау орталығының заңгерлері сотта аталған әйелдердің құқығын қорғайды.

— Еуропаның Адам құқығы жөніндегі соты Ресейге Адам құқықтары жөніндегі Еуропа конвенциясының бұзылуына байланысты сұрақтар жолдайды. Жауапкердің шағым беруші тараппен бейбіт келісім жасауға құқығы бар. Әйтпесе істі қарау басталады,- дейді заңгер Иван Новиков.

Мәскеудің Гольяново ауданындағы Уральская, Парковая және Новосибирская көшелерінде орналасқан азық-түлік дүкендер желісі оларды құлдықта ұстаған.

«Гражданское содействие» қорының мәліметінше кәсіпкерлер мигранттардың құжаттарын тартып алып, оларды тіркеуден бас тартқан. Еңбекақысын төлемей, дүкен аумағынан шығармай қойған.

«Дүкен иелері мен қызметкерлері Қазақстан және Өзбекстан азаматтарын жылдар бойы ақысыз жұмыс істетіп, зорлаған, ұрып-соққан. Құқық қорғау органдары арқылы қудалаймыз деп қоқан-лоқы көрсеткен» деп жазды комитет өкілдері.

Комитеттің айтуынша, Ресей полицейлері мен тергеушілері олардың шағымына байланысты іс қозғаудан бас тартқан.