Қайырымдылық жәшіктерінен түскен ақшаға лаңкестерді қаржыландырған

Полицейлер Ақтаудағы ірі сауда орталықтарының кіреберісіндегі қайырымдылық жәшіктерін тексерді. Тәртіп сақшыларының айтуынша, жәшіктерге жиналған ақша заңсыз діни әрекеттерге жұмсалған.

Маңғыстауда облыстық ПД экстремизмге қарсы күрес басқармасы, жергілікті полиция қызметі бөлімі және әкімшілік кәсіпкерлік бөлімі қызметкерлерінен арнайы мониторингтік топ құрылды.

Олар Ақтау аумағында орналасқан ірі сауда орындарындағы қайырымдылық жәшіктерінің заңдылығын тексерді. Сонымен қатар, аталған сауда нүктелерінің иелеріне түсіндіру жұмыстары жүргізілді.

«Рейдтің басты мақсаты – қайырымдылыққа бөлінген қаржының жеке мақсатқа, өз мүддемізге жұмсалуын бақылау. Осындай жәшіктерге жиналған ақшаның заңсыз діни іс-шараларға жұмсалғаны анықталды. Сондай-ақ деструктивті діни ағымды жақтаушылар тобы «қайырымдылық жинау» арқылы террористік, экстремистік ұйымдарға қаржылай демеушілік жасағаны туралы деректер бар» деп хабарлайды lada.kz сайтына полиция департаменті.

Маңғыстау облысының полиция департаменті мұндай заңсыз әрекеттер үшін жауапкершілік ҚР Қылмыстық кодексінің бабымен қарастырылғанын ескертіп, облыс тұрғындары мен қонақтарын мешіттерде орналасқан арнайы орнатылған қайырымдылық жәшіктерін пайдалануды сұрайды.