Лайықпын, бірақ алмаймын: Пәкістан Трампты Нобель сыйлығына ұсынды

Пәкістан билігі АҚШ президентін Үндістанмен қақтығысты шешуге делдалдық жасағаны үшін 2026 жылғы Бейбітшілік жөніндегі Нобель сыйлығына ұсынды, деп хабарлайды Orda.kz.

Исламабадтың пікірінше, дәл АҚШ көшбасшысының әрекеттері жағдайдың ушығуын тоқтатуға көмектесіп, тұрақтандыруда шешуші рөл атқарған.

«Дональд Трамп екі ядролық держава арасындағы шиеленістің күрт өршуі кезінде стратегиялық көрегендік пен мемлекет басқаруда даналық танытып, Исламабадпен де, Нью-Делимен де дипломатиялық қарым-қатынас орнатты», – делінген Пәкістан үкіметінің бұрынғы Twitter (қазіргі Х) әлеуметтік желісіндегі парақшасында. 

Бұған дейін де Трамп беделді сыйлыққа ұсынылған болатын. 2021 жылы ол соңғы 30 жылда жаңадан соғыс бастамаған алғашқы АҚШ президенті ретінде кандидаттар қатарына енген еді.

Өзінің ұсынылғанын түсіндірген Ақ үй басшысы Truth Social әлеуметтік желісінде Бейбітшілік жөніндегі сол Нобель сыйлығына лайық екенін, бірақ оны ешқашан алмайтынын мәлімдеді.