Ұл болып туған қыз: Алматы перзентханасында жанжал шықты

Осыдан 3 ай бұрын Алматының №3 перзентханасында босанған Мақпал Нұрлан жаңа туған нәрестесінің ұл емес, қыз екенін дәлелдей алмай келеді.

31 арнаның хабарлауынша, перинаталдық орталықтың дәрігерлері қыз баланың туу туралы куәлігіне «ұл» деп жазып, қате жіберген.

Ажардың дүниеге келгеніне біраз болса да, әлі күнге дейін құжатсыз жүр.

29 қыркүйек күні перзентханада бесінші баласын дүниеге әкелген көпбалалы ана ойда-жоқта қиындыққа тап болған.

«Өзі қыз, құжат бойынша ұл. Бізге өзгертіп бере алмай жатыр. Баламның әлі туу туралы куәлігі жоқ. Екі жарым ай болды бізде әлі құжат жоқ. Азан шақырып Ажар деп ат қойдық, бірақ туу туралы куәлігі жоқ. Соны өзгертіп бере алмай жатыр. Бір жарым айда өзгертіп береміз деп айтқан» дейді Мақпал Нұрлан.

Жаңа туған сәбидің әкесі Ұларбек Омар Қазақстанда бәрі қағазбен шешілетініне, оның өзі дұрыс ұйымдастырылмағанына қынжылды. Орталыққа бірнеше рет келгенімен, ешкімнен толымды жауап ала алмаған.

«Азаматтығымыз бар, ЗАГС-ымыз бар. Толыққанды ҚР азаматымыз. Екі жарым айдан бері осы. Туу туралы куәлікті бермей жатыр. Қайда барсаңдар онда барыңдар деп, бізге дұрыстап жауап та бермей тұр» дейді Ұларбек.

№3 перзентхананың дәрігерлері өздерінің қате жібергендерін мойындап отыр. Бірақ олар мұның дәрігер қателігі емес екеніне сенімді.

«Бұл қателік дәрігер салғырттығына да, дәрігер қателігіне де жатпайды. Бірақ ақпараттық жүйеге сәби туралы ақпарды енгізген кезде оператор бала жынысын жаңсақ жазған. Біз бұл қателікті бірден байқадық. Бірақ барлық ақпараттық жүйе бір-бірімен байланыста болғандықтан,  оны сол жерде жөндей алмадық. Біз алгоритм бойынша өзімізден жоғары тұрған мекемеге хат жаздық» деп түсіндірді Алматы қалалық перинаталдық орталық директорының орынбасары Салтанат Ерболатова.

Ал қалалық денсаулық сақтау басқармасында қателік жақында жөнделетінін алға тартты.

Ажардың ата-анасы құжатты алсақ болды, басқа ештеңе керек емес деп сендірді.