Қызылтас тұрғындары 20 жылдан бері ауыз сусыз отыр

Жетісу облысындағы саяжай алабы тұрғындары 20 жылдан бері ауыз сусыз және жарықсыз өмір сүруде, деп хабарлайды Orda.kz.

Талдықорған маңындағы Қызылтас тұрғындары жылдар бойы таза су тапшылығынан зардап шегуде. Елді мекенге су құбырын салуға миллиондаған қаражат бөлінсе де, саяжайлықтар ауыз суды қаладан әкелуге мәжбүр. Жергілікті халықтың айтуынша, ауыз су өткізу жұмыстары екі жыл бұрын басталған еді, алайда көп ұзамай тоқтап, аяқталмады.

Жергілікті тұрғын Райымбек Садырбеков күн сайын қаладан кем дегенде 10 литр ауыз су сатып әкеледі. Сондай-ақ жол жүру шығындары да бар. Қарттың айтуынша, зейнетақысының жартысын суға жұмсауға тура келеді, ал тұрмыстық қажеттіліктерге суды құдықтан алады.

Тұрғындардың айтуынша, жарық мәселесі де шешілмей келеді. Көше жарығын орнату жақын арада мүмкін емес екенін сала мамандары тұрғындармен кездесуде ашық айтты. Жарыққа қаражат тек 2026 жылы бөлінуі мүмкін.