Қызылшаға қарсы екпе алмаған балалар сабаққа кірмейді

Еліміздің бас мемлекеттік санитарлық дәрігері Сархат Бейсенова тиісті қаулыға қол қойды. Қаулы 19 ақпаннан бастап күшіне енді, деп хабарлайды Orda.kz.   

Құжатқа сәйкес, қызылша дерегі тіркелген жағдайда екпе салдырмаған балалар балабақша мен мектепке уақытша қабылданбайды. Бұл шешім инфекцияның әрі қарай таралуының алдын алу мақсатында қабылданған.

Сондай-ақ құжатта білім беру басқармаларына екпе салу деңгейін кемінде 90 пайыздан төмендетпеу міндеті жүктелген. Бұдан бөлек, білім беру ұйымдарында күн сайын «таңғы тексеріс» жүргізілуі тиіс.

Яғни, әр таң сайын оқушылар мен мұғалімдер тексеріліп, ауру белгілері байқалған адамдардың ғимаратқа кіруіне шектеу қойылады. Сонымен қатар ата-аналар арасында иммундаудың маңызы жөніндегі түсіндіру жұмыстары күшейтіледі.

Еске салсақ, 5-ақпанда ҚР денсаулық сақтау министрлігінде ведомство басшысы Ақмарал Әлназарованың төрағалығымен  қызылша ауруына қатысты эпидемиологиялық ахуалға арналған республикалық штаб отырысы өткізген болатын.

Оқи отырыңыз: 

• Щучинск қаласындағы әскери колледжде қызылша ауруы өршіді
• Ақтөбе облысында алты бала қызылша індетімен жансақтау бөлімінде жатыр
• Профилактикалық екпелерден бас тарту көбейді