Қызылша ауруының өршуі: Қазақстанға 500 мың доза вакцина әкелінді

23 қараша 2023 10:07 Амиржан Мухаммед

Алматыға қосымша жаппай иммундау үшін қызылшаға, қызамыққа және эпидемиялық паротитке қарсы 500 мың доза көлеміндегі вакцина партиясы келді.

Ведомство Қазақстанда қызылша ауруы бойынша эпидемиологиялық жағдайды тұрақтандыру үшін шұғыл ден қою шаралары қабылданғанын еске салды. Халық арасында қызылша инфекциясының одан әрі таралуына жол бермеу мақсатында бас мемлекеттік санитарлық дәрігер вакцинация мәртебесіне қарамастан балаларды қызылшаға, қызамыққа және эпидемиялық паротитке қарсы қосымша жаппай иммундау жүргізу туралы қаулыға қол қойды.

«Денсаулық сақтау министрлігі халықты иммундау үшін вакцинаның қосымша көлемін сатып алу бойынша жұмыс жүргізді. Жалпы, қосымша жаппай иммундау үшін МКР-ға қарсы вакцинаның 1,5 миллионнан астам дозасы сатып алынды.
Келіп түскен вакцина ҚР ҚСЭК бұйрығына сәйкес ел аймақтарына жедел жөнелтілетін болады. Бірыңғай дистрибьютор барлық GMP және GDP стандарттарына, сондай-ақ «суық тізбекке» сәйкес иммунобиологиялық препараттарды логистикамен қамтамасыз етеді» деп хабарлады министрлік.

Бұл вакцинаның өндірісінде ДДСҰ алдын ала біліктілігі бар, ол шығарылатын вакциналардың сапасы мен қауіпсіздігіне кепілдік береді. Қызылшаға қарсы вакцина 60 жыл бойы қолданылып келеді және індеттің таралуын тоқтату үшін ұсынылады.

«Биыл біздің елімізде, әлемнің көптеген елдеріндегідей, қызылша ауруы бойынша қолайсыз эпидемиологиялық жағдай қалыптасып отыр.Қызылша жұқпалы вирустық инфекция болып табылады, инфекция ауа-тамшы арқылы таралады. Қызылшамен ауырған және оған қарсы вакцина алмаған адам, өмір бойы қызылшаға өте сезімтал болып қалады және кез келген жаста ауырып қалуы мүмкін.
Денсаулық сақтау министрлігі ел тұрғындары арасында қызылшаның одан әрі таралуының алдын алу мақсатында 6 қарашадан бастап қызылшаға қарсы қосымша жаппай иммундау жұмыстарын бастады» деп толықтырды Денсаулық сақтау министрлігі.

Ведомство 6 айдан 11 айға дейінгі балалар бірінші кезекте екпе алатынын еске салды. Желтоқсан айынан бастап 2 жастан 5 жасқа дейінгі балаларға, егу мәртебесіне қарамастан, медицина қызметкерлеріне (55 жасқа дейін), сондай-ақ профилактикалық екпелерді өткізіп алған 18 жасқа дейінгі адамдарға қызылшаға қарсы қосымша иммундау жоспарлануда.

Қызылшаға қарсы профилактикалық егулер күнтізбесіне сәйкес біздің елімізде жоспарлы түрде екі рет егіледі: бала бірінші егуді 12-15 айлығында, екіншісін 6 жаста алады.

Жаңалықтар

барлық жаңалықтар