Қызылордада 10-сынып оқушысын сыныптастары соққыға жықты

Қызылордада №198 мектептің 10-сынып оқушысы Олег Кимді мектеп дәретханасында бірнеше оқушы ұрып-соқты. Анасы баласының құқығын қорғап, әділдік іздеп жүр, деп хабарлайды Orda.kz.

Оқиға 8 қазан күні таңертең №198 орта мектеп дәретханасында болған. Жанжалдан бір күн бұрын «Күзгі бал» байқауының чатында Олег пен басқа сыныптың оқушысы арасында кикілжің туындаған. Келесі күні мектеп оқушысын қатарластары ұрып-соққан.

Олегтің анасы Наталья Кимнің айтуынша, баласын алты мектеп оқушысы жабылып, ұрып-соққан. Алайда полиция хаттамасында төбелес «екеуара жанжал» деп көрсетілген. Тергеуші әлі күнге дейін соққыға жығылған баладан жауап алмаған. Сонымен қатар сот-медициналық сараптама да тағайындалмаған.

Олегтің анасы баласының екі жерден жақ сүйегі мен мұрны сынғанын, миы шайқалғанын айтады. Қазір оқушы ауруханада ем қабылдап жатыр. Дәрігерлер оған ота жасап, жақ сүйектерін уақытша темірмен бекіткен. Анасы әділ тергеу болып, кінәлілердің жазаланғанын қалайды.

Айта кетейік, Алматыда есту қабілеті нашар таксисті бейнеге түсірген блогер елден кешірім сұрады.