«Қызыл кітаптағы құстар»: 1 тамыздан бастап Қарағандыда блокпост орнатылады

Қарағанды облысында 1 тамыздан бастап «Сокол» атты табиғат қорғау акциясы басталады. Бұл акцияның мақсаты – балобан құстарының ұшып көшуі кезінде браконьерлікке тұсау салып, тыйым салу болып отыр.

Бұл туралы Қарағанды облыстық әкімдігі хабарлады. 

Қызыл кітапқа енген құстардың ұшуы мүмкін жерлерге, яғни тас жолдарға бақылау посттары орнатылады. Акцияға «Охотзоопром» инспекторлары, облыстық орман шаруашылығы және жануарлар дүниесі инспекциясының қызметкерлері, табиғи ресурстар және табиғат пайдалану басқармасы, сондай-ақ құқық қорғау органдары өкілдері қатысады. 

«Акция 1 тамыздан 31 қазанға дейін жалғасады. Бұл акцияға 11 инспектор, екі жүргізуші, 4 жеңіл автокөлік және екі «КУНГ» КамАЗ-ы жұмылдырылады. Инспекторлар қызметтік қару, қорғаныс жилеттері, кісендер, планшеттер, бейнежазба құралдары және басқа да жабдықтармен қамтамасыз етіледі, – деп хабарлады Регионалдық коммуникациялар платформасында РМҚК «Охотзоопром» Орталық өңірлік филиалының басшысының орынбасары Шыңдос Омаров.

Балобан құстарын заңсыз аулағандар ҚР Қылмыстық кодексінің 337 және 339-баптарына сәйкес қатаң жазаға тартылады. Заң бұзушыларға 3000 МРП-ға дейін айыппұл салынады немесе мүлікті тәркілеумен 5 жылға дейін белгілі бір лауазымдарды атқару құқығынан айырумен 3 жылға бас бостандығынан айырылады. Бір балобан құсы үшін залал төлемі 700 МРП немесе 2 415 000 теңге болады.

«Балобан құстары Қазақстанның Қызыл кітабына, Халықаралық табиғатты қорғау одағының Қызыл кітабына және CITES (СИТЕС) қосымшасы 2-ге енгізілген. Балобандар мен олардың дериваттары, мысалы, жұмыртқалар мен қауырсындарды шекара арқылы өткізу тек Қазақстандағы СИТЕС әкімшілік органының рұқсатымен ғана болады, – деді Қарағанды облыстық орман шаруашылығы және жануарлар дүниесі инспекциясының басшысы Абзал Балтабаев.

Әр көктем сайын балобан құстарының популяциясын арттыру мақсатында өңірде қорғау шараларын жүргізе отырып, табиғи ортаға шығарып салады. Биыл 63 құс ұшырылды.