Қызыл кітапқа енген итбалықтар Каспий теңізінде қырылып жатыр

Түпқараған ауданындағы Каспий теңізінің жағалауында соңғы бірнеше күнде 80-ге жуық итбалық өлексесі табылды.

Инспекторлар мен экологтар жануарлардың өлекселерін ыдыраған күйде тапты. Ғалымдардың пайымдауынша, итбалықтар қыста өлген және олардың өлекселері осы уақыт бойы суда жатқан.

«Олар 23 сәуірде басталып, бүгінге дейін жалғасып жатқан батыстан соққан дауылды жел салдарынан жағаға шықты. Ұшалардың жағдайына байланысты сынама алу қиындықтарына қарамастан, ішкі ағзалары мен азу тістерінің бір бөлігі әрі қарай зертханалық зерттеуге алынды» деп хабарлады Маңғыстау облысы бойынша балық инспекциясы басқармасы.

Сирек кездесетін жануарлардың өліміне не себеп болғаны туралы әзірге ешқандай болжам жоқ, бірақ итбалықтардың дене жарақаттары болмағаны белгілі.

Бір айдың ішінде Каспий теңізінен 182 өлі итбалық табылды.