Қызметтік өкілеттігін асыра пайдаланды: Ақтау портының президентіне қатысты қылмыстық іс қозғалды

Ұлттық қауіпсіздік комитеті «Ақтау халықаралық теңіз сауда порты» ҰК» АҚ президенті Абай Түлікпенбаевқа қатысты қылмыстық іске байланысты ресми мәлімдеме жасады. 29 мамырда Түлікпенбаев қамауға алынып, қазіргі таңда тергеу изоляторында отыр, деп хабарлайды Orda.kz.

Комитеттің ақпаратына сәйкес, оған ҚР Қылмыстық кодексінің «Қызметтік өкілеттіктерді асыра пайдалану» бабы бойынша сотқа дейінгі тергеп-тексеру амалдары жүргізілуде. Аталған бап бойынша мүлікті тәркілеумен қатар, жеті жылға дейін бас бостандығынан айыру және белгілі бір лауазымдарды атқаруға өмір бойы тыйым салу қарастырылған.

Оның қамауға алынуы мұнайды контрабандалық жолмен тасымалдауға және елден заңсыз шығаруға әрекет жасалған «Мелиана» танкеріне байланысты болуы мүмкін. Бұл танкер «БатысНефтеТрэйд» ЖШС-не тиесілі.

Еске салайық, Ақтау теңіз портының президенті Абай Түлікпенбаев қызметтік өкілеттігін асыра пайдаланды деген күдікке ілінген.

2023 жылдың шілде айында ҰҚК арнайы операция жүргізген болатын: күштік құрылымдар елден контрабандалық мұнай тасымалдап жатқан танкерді тоқтату үшін тікұшақ пен катер қолданған.