Қызметінен кеткен Дариға Назарбаеваның ұлы миллиондарды арқалап кетті

Нұрсұлтан Назарбаевтың немересі Нұрәлі Әлиев «Транстелеком» АҚ акционерлері мен директорлар кеңесінен шықпас бұрын қомақты дивиденд алып үлгерген, деп хабарлайды Orda.kz.

Нұрәлі Әлиев 12 ақпанда «Транстелекомдағы» өз үлесін сататынын мәлімдеді. Дәл сол күні компания 2023 жылға арналған акциялар бойынша дивиденд төлеу туралы шешімін жариялады. Бұл туралы Қазақстан қор биржасының (KASE) сайтында жарияланған құжатта көрсетілген.

Дивидендтер 31 қаңтарда төленген, олардың жалпы сомасы алты миллиард теңге болды. Нәтижесінде, 27 қаңтардағы жағдай бойынша компания акцияларына иелік еткен инвесторлар шамамен 4,5 млрд теңге (бір қарапайым акцияға 1064,19 теңге) алған, қалған сома кейінірек төленеді. Сол кезде Нұрәлі Әлиев пен Дмитрий Покупателев «Unit Telecom» ЖШС арқылы «Транстелеком» акцияларының 75%-ына иелік еткен.

Назарбаевтың немересі компаниядағы үлесін сататынын жариялағаннан кейін, директорлар кеңесінің төрағасы қызметіне Дмитрий Покупателев тағайындалды. Сондай-ақ, компанияның жоғары басшылығында өзгеріс болды. Директорлар кеңесіндегі екі мүшенің орнына Jusan Mobile-дың үш өкілі енгізілді. 

Jusan Mobile-ды қазіргі Jusan Bank иесі Ғалымжан Есенов JV Holding Ltd. холдингтік компаниясы арқылы басқарады. Қазақстанның ең бай кәсіпкерлерінің бірі Вячеслав Ким Jusan Bank-ті сатып алуға ниетті екенін растағанын ескерсек, Есенов бұл активтің орнына Нұрәлі Әлиевтің «Транстелекомдағы» үлесін алуды жоспарлауы мүмкін.