«Қыз Жібек» фильмі: қырғыз режиссер жайлы дау не себепті қозғалды?

Қазақтың ең көркем жырларының бірі «Қыз Жібек» екені анық. Жақында қырғыз профессоры Эмиль Каниметов сол кезде режиссер Мелис Убукеевтің фильм үшін еңбек етіп, режиссері бола алмай қалғанын айтып, жазба жариялады, деп хабарлайды Orda.kz. 

Оның сөзінше, Мәскеудің орталық газетінде 1970–1971 жылдары қазақ эпосын қырғыз режиссеріне сенуге қарсылық білдірген мақалалар жарияланған. 

Себебі осы уақытқа дейін тілі мен мәдениеті ұқсас, бауырлас екі ел арасына от салған даулы оқиғалар жетеді. Бауырлас қырғыз елінің таңғажайып эпостары жетерлік. Ендеше қырғыз режиссердің өткен кезеңдегі «өкпесін» айту арқылы не көздегенін өзіңіз топшылап көрерсіз. 

Эмиль Каниметовтің айтуынша:

«Бұл мақалалар кездейсоқ емес, олар Қазақстандағы белгілі бір топтардың қолдауымен шыққан. Сол кезде Дінмұхамед Қонаев ірі одақтық кино жобаларын бөлуге ықпал еткен». 

Каниметов Мелис Убукеев фильм үшін үлкен еңбек етіп, түсіруге құлшынғанын айтып өтті.

«Ол сценарийді Исаий Досжановпен бірге қайта жазып, кейіпкерлердің либреттосын жасап, актерлерді бекіткен. Түсірілім орындарын таңдап, костюмдер мен декорацияларды әзірлеген. Дегенмен, бір түнде фильм «ұлтқа байланысты» басқа режиссерге берілген». 

Айта кетейік, режиссер Сұлтанахмет Қожықов түсірген «Қыз Жібек» 1971 жылы нағыз шедеврге айналды. Ол фильмде қазақтың көшпелі мәдениетін ерекше шеберлікпен аса көркем етіп көрсетті. Сценарийді жазушы Ғабит Мүсірепов жазды. Сондай талантты азаматтар бас қосқан жобада Нұрғиса Тілендиев композитор болып, туындының музыкасын көркем етіп, аса шеберлікпен жеткізді.