Қытаймен шекарада жаңа өткізу пункті ашылады

Алматы облысындағы Нарынқол ауылының маңында Қытаймен мемлекеттік шекара арқылы жаңа жаяу жүргіншілер өткізу бекетін ашу жоспарлануда, деп хабарлайды Orda.kz.

«Қытаймен визасыз режимді тиімді пайдалану және туристерді көбірек тарту үшін Нарынқолда жаяу жүргіншілер өткізу бекетін және жаңа туристік бағыттарды ашу жоспарлануда», - деді аймақ басшысы Орталық коммуникациялар қызметінде өткен баспасөз мәслихатында. 

Әкім республикалық туристік картаға енгізілген әрбір оныншы нысан Алматы облысында орналасқанын қосты.

Еске сала кетейік, 10 қарашада Қазақстан Республикасы Үкіметі мен Қытай Халық Республикасы Үкіметі арасындағы визалық талаптардан өзара босату туралы келісім күшіне енді.

Азаматтардың екі мемлекеттің аумағында болу мерзімі мемлекеттік шекараны кесіп өткен сәттен бастап күнтізбелік 30 күн, ал 180 күнтізбелік күн ішінде барлығы 90 күнтізбелік күннен аспауы керек.

Егер азаматтарға 30 күннен астам тұру қажет болса, олар алдын ала тиісті санаттағы кіру визасын алуы керек. Визасыз режим жұмыс істеу, оқу немесе миссионерлік қызметпен айналысу құқығын бермейді.