Қытайға жүк көлігін айдап барып, шекарада ұсталған Қазақстан азаматының соты болады

Қытайда туып, Қазақстанға көшіп келіп азаматтық алған Әлімнұр Тұрғанбай Қытай түрмесінде отыр. Оның соты 17 қыркүйекте өтеді, деп хабарлайды Orda.kz Азаттыққа сілтеме жасап. 

Әлімнұр Тұрғанбайдың отбасы «ашық сотқа» шақырту алды. Тұтқынның туыстарының айтуынша, 5 қыркүйек күні Қытай жағынан сондай «ауызша хабарлама» келген. Олар нақты кімнен, қалай келгенін ашық айтпады. Сонымен қатар, Әлімнұр Тұрғанбайға  тағылған айып жөнінде ешқандай құжат берілмеген.

Айта кетейік, Әлімнұр Тұрғанбай 23 шілде күні жұмыс бабымен Шыңжаңға кетіп, сол күйі оралмады. 48 жастағы Әлімнұр Тұрғанбай Қазақстаннан Қытайға жүк көлігін айдап барған. Ол тауар тиеп алып, кері қайтпақшы болғанда шекарада ұсталған. Қытай жағы Әлімнұр Тұрғанбайдың ұсталғанын растап, оның әлі де Қытай азаматы екенін, Қытайда қос азаматтық танылмайтындығын атап өтті. Алайда туыстары бұл деректі жоққа шығарады.