Қытайдың алып компаниясы Қазақстанда ықпалын арттырмақ

Азиядағы мұнай өндіру бойынша көшбасшы Қытайдың CNPC мұнай-газ корпорациясы Қазақстандағы өз ықпалын айтарлықтай кеңейтуді жоспарлап отыр.

Бұл туралы Reuters хабарлады.

Бұл компания өзінің жаһандық стратегиясын қайта қарап, Қазақстанды негізгі инвестициялық бағыттардың бірі ретінде таңдап отыр.

CNPC сұйытылған газ өндіру және терең судағы бұрғылау жобаларына инвестицияларын арттыруды көздейді. Бұған себеп — Қытайдағы мұнай өндірісінің төмендеуі болды. CNPC Экономикалық және технологиялық зерттеулер институтының директоры Лю Рюкван компанияның инвестицияларын екі онжылдық бұрынғы деңгейге жеткізуге ниетті екенін растады. Ол кезде CNPC PetroKazakhstan-ды сатып алған болатын.

Ресейге, Иранға және Венесуэлаға қарсы санкциялар аясында CNPC Қазақстанға басымдық беріп, қолданыстағы келісімшарттарды ұзартуды және жаңа бастамаларды іске қосуды жоспарлап отыр. Сол жобалардың бірі – шілде айында Си Цзиньпиннің Астанаға сапарынан кейін жарияланған қуаттылығы 400 МВт болатын жел электр станциясын салу жобасы.