Қытайда өтіп жатқан Азия ойындарында Қазақстан қоржынына алғашқы медаль түсті

Қазақстанға алғашқы медальді 48 келі салмақта финалға шыққан дзюдошы Абиба Әбужақынова жеңіп алды. Жартылай финалда оңтүстіккореялық Ли Хе Кёнды ұтты.

Sports Schrödinger хабарлауынша, дзюдодан бірінші күннің финалдық бөлімі сағат 14:00-де басталады. Абибаның финалдағы қарсыласы осы салмақта соңғы үш әлем чемпионы атанған жапондық Нацуми Цунода болмақ.

Сондай-ақ бүгін қазақстандық Мағжан Шамшадин (60 келі) жартылай финалда оңтүстіккореялық Ли Ха Римге есе жіберіп, енді қола үшін күреседі. Ширек финалда ұтылып, қайта кездесуде жеңіске жеткен Ғалия Тынбаева (52 келі) де қола жүлдені сарапқа салады.

Айта кетейік, қазақстандық спортшы Елена Потапенко Парижде өтетін Олимпиада ойындарына жолдама жеңіп алған болатын. Потапенко Ханчжоудағы Азия ойындарында заманауи бессайыс бойынша әйелдер арасындағы жеке жарыста 5-орынға ие болып, 2024 жылы Францияда өтетін Олимпиадаға лицензия алды.