Қытайда басы дауға қалған блогер қыз Өзбекстанда да жігіттерге «қырыңдады»

Қазақстанда метрода жігіттерге қолын тигізіп контент түсіретін блогер Аружан Айбекованың Қытайда басы бәлеге қалған еді. Осы жолы ол Ташкент метросында өзбекстандық жігіттерге қолын тигізіп, пранк жасады, деп хабарлайды Orda.kz.

Аружанның әрекетін желі қолданушылары арандатушылық деп бағалады. Блогер бейтаныс жолаушылардың жанына отырып, қолына, аяғына қолын тигізген.

«Пранктің мақсаты түсініксіз. Бірақ өзбек сегментіндегі желі қолданушыларының ашуы анық байқалады. Себебі Ташкентте қоғамдық көлікте жыныстық емеурін таныту тақырыбы — әзіл көтермейтін мәселе деп жазады Өзбекстандық Vaib.uz басылымы.

Vaib.uz мәліметінше, мұндай әрекеттері үшін блогер бес тәулікке дейін қамауға алынуы мүмкін.

Айта кетейік, блогер Instagram парақшасында Ташкент көшелерінде түсірілген өзге де «әлеуметтік эксперименттерін» жариялаған. Алайда аудитория мұндай контентті құптамады.

Айбекова шетелде де осындай дауларға іліккен болатын. Қытайда ол ұялы телефон ұрлығын көрсететін пранк түсірген. Сол сәтте жергілікті полиция тексеріс бастаған.

Блогер ол кезде жазаға тартылмағанымен, Қазақстанға оралған соң, оған полиция түсіндіру жұмыстарын жүргізді. Аружан көпшілік алдында кешірім сұрап, енді контент таңдауда мұқият болуға уәде берген еді.