Қытай-Қазақстан арасында визасыз режим енгізілді: қазақстандықтар нені білуі керек

Қазақстандықтар үшін Қытаймен визасыз режим жұмыс істей бастады. 10 қарашада визалық талаптардан өзара босату туралы келісім күшіне енді.

Қазақстандықтар ҚХР-ға шекарадан өткен сәттен бастап 30 күннен аспайтын кезеңге алты ай ішінде жиынтығы 90 күн ішінде кіре алады.

«Тараптардың бірі мемлекетінің азаматтары екінші Тарап мемлекетінің аумағы арқылы кіру, шығу, транзит үшін жеке істерді, туризмді, емдеуді, халықаралық тасымалдарды, транзитті, сондай-ақ іскерлік мақсаттарды (келісімшарт жасасу, келіссөз жүргізу, консультациялық қызмет көрсету және басқа да іскерлік негізде) жүзеге асыру мақсатында визалық талаптардан босатылады. Егер жарамды жол жүру құжат иелері кіруге, кетуге немесе транзитпен жүруге ниет білдірсе, алайда сапардың мақсаты немесе мерзімдері келісімге сәйкес келмесе, онда олар кірер алдында тиісті виза алуға жүгінуі тиіс» делінген СІМ хабарламасында.  

Азаматтар 30 күннен артық болу қажет болған жағдайда тиісті санаттағы кіру визасын алдын ала ресімдеуі қажет. Визасыз режим жұмысқа орналасуға, оқуға және миссионерлік қызметке құқық бермейді.

«Визасыз режим жұмыс істеуге, оқуға және миссионерлік қызметке құқық бермейді. Жоғарыда аталған келісім ҚХР Гонконг және Макао арнайы әкімшілік аймақтары аумағына баруға қолданылмайтынын ескертеміз. Гонконг 14 күннен аспайтын мерзімге визасыз; Макаоға бару үшін визаға өтініш беру керек» деп атап өтті министрлік. 

Жалпы, қазақстандықтар визасыз 34 елге бара алады.